الأهلى تحت الجميع

الأهلى تحت الجميع

كل الأهلاوية للأسف الشديد فاكرين ناديهم واصل لدرجة يستحق عليها تشجيع "جامد"..وتعليق بوسترات ....وتأليف اغانى من ناس بتقلب عيشها من الموضوع ده وبيستغللوا سزاجة الأهلاوية اللي هي جزء من سزاجة الشعب كله
"ونزل رنات موبايلات وشعارات وخلى العجلة تدور وشركات الموبايلات تلاقى مصدر تانى للكسب من الناس ال.......؟"
لكن حقيقة الأمر بكل بساطه أن الأهلى فريق لا يستحق أى نوع من الثناء ... ليه؟
لأن الدورى الأهلى بياخده علشان ببساطه مفيش فرق أمامه.......
تخيل طالب ف ثانوى كل يوم يروح يضرب طلبة ف أبتدائي.!!!!
ولما الأهلى يقابل فريق محترم بتكون النتيجه سيئة للغايه
*******
وكمان أية بطولة أفريقيا؟؟؟
حبة فرق مفيهاش ولا واحد بيبلعب ف منتخبتها الوطنية......... ونفرح قوى لما بالعافية نكسبهم!!!!!!! وياريت الأهلى بيكسب.............
*******
والله دى مش شماته أنا مش زملكاوى بس انا بحاول افهم معاكم أيه الكويس يعنى ف النادى الأهلى .. غير أنه نادي لياقة بدنية نروح نلعب فية رياضة مش أكتر: أما الأنتماء الحقيقى فيكون ل"مصر" علشان ده وطنك اللي انت عايش فيه واللا خلاص ده بقى كلام أنشاااااااا....

وما تقوليش الاهلى بيلعب لمصر … الاهلى بيلعب للأهلى……. ده كمان فيه أهلاويه بيزعلوا لما لعبيتهم بيروحوا المنتخب ويقولك "اصل ده بيأثر على مستواهم"

*********

وبعدين الأهلي دة سبب نكسة الكرة المصرية؟ قوللي ليه........؟
قولتلى ليه !

اقلك ....... بزمتك فى فريق ف العالم وظيفة مدربينه والأداريين اللى فيه أنهم قاعدين يراقبوا بقية الأندية "الغلبانة" فبالصدفة يطلع عندهم لاعب كويس ...... فبسرعة "وبطريقة أجرى بسرعة يا واد ياحسين" يشتروه..........وياويل أو ياحظ"الله أعلم اللاعيبه المتخلفة دى بتفكر ازاى" اى لاعيب يلمس الكورة ادام النادى الأهلي ..... يبقى السماسرة الحلوين الأمامير اللى معاهم فلوس متفهمش جايبنها منين"واللى المشكلة انك عمرك ما تشوف حد منهم نضيف"....هيشتروه هيشتروه
"وعلى فكرة دى مش مشكلة الأهلى بس .. الزمالك كمان بيساهم فى تدمير الكرة المصرية عن طريق شراء اللاعيبة من الفرق الصغيرة"
اااادي الحكاية وااادى ببساطة سبب انهيار الدوري المصرى
لأنهم بيشتروا كل اللاعيبه اللى فى مستوى معقول من الأندية الأخري وف النهاية ما بيلاقوش فرق منافسة
وياخدواالدورى والكاس والكوبايه لو فيه

********
الأهلى"الكوره عموما" سبب غياب الناس عن المشاركة فى كل نواحى الحياة

أما بقى حبايبنا التافهين اللى كل حياتهم محصورة فى "أبوتريكة وعماد متعب" بقلهم فى حاجات تانية بجد أهم من الموضوع ده فين العراق واللى بيحصل فيها من أهتمامتكم....... فين فلسطين .......فين لبنان......... الحال المتردى اللى بيعيشه الوطن العربى كله ......... الهيمنة الأمريكية على أقتصادنا وأعلامنا وكمان افكارنا!!! أنا مش ضد الأهتمام بالرياضة والكورة على وجة الخصوص لكن مش بالشكل الزيادة اللى بيكمل حالة السلبية واللا مبالة اللى الشباب بيعيشها دلوقتى

أحنا مش عايزين أرضنا تتباع وتتسرق واحنا بنتفرج ع المطش

أنا عارف أن فية شريحة من الناس بتابع الكورة لكن حياتها مش محصورة فيها لكن برضه دول مش بيتابعوا أى شىء تانى بنفس درحة الأهتمام وكمان بحس أنهم لى حد كبير مضحوك عليهم ........ ماشيين ورا الناس .........كله اتولد لقي الكل بيشجع الأهلى فيلللا "هو يعنى اللى هيفكر" "القطيع" اللى كل الشعب ماشي فيه وبعدين ليه مش بيتكلموا على قضايا مهمة بنفس الأهتمام والحماس اللي بيتكلموا بيه ع الكورة"مين أتكلم على شباب مصر اللى غرقواعلى"" سواحل ايطاليا"" ولو كان حد اتكلم..... فكر يعمل أيه ....... فكر أيه الحل…..ده حتى البرامج كلها أصبحت بتتكلم عن الكورة وما تلاقيش برامج سياسية أو أجتماعية بالقدر الكافى…... فكر أن اللى مات وهو رايح يشتغل ف ايطاليا ده كان ممكن يكون أخوه" ده طبعا بصرف النظر أن أحنا ف الاصل كلنا أخوات" ببساطه أحنا عايزين يبقى لينا دور أكبر من أننا نشجع كورة ووقتها هيكون الأهلى وكل المضوعات التافهه اللى اصبحت تشغل حياتنا
"تحت الجميع"
وعلى فكرة القضية مش أهلى وزمالك
الحكاية أكبر من كدة بكتير المشكلة أن فيه جيل جديد ظهر مفيش ف حياته أي شيء غير الكورة او حاجات مماثلة والجانب العملى فحياته ماشي زى ما الناس ماشيه "متساق زى ما الناس متساقه" فى قوة خارجية أستعمارية عايزانا نفضل مغيبين ويفضل شبابنا يلف ف ساقية واحدة من يوم ولادته وهى التعليم وبعدين يخش ف دوامة الشغل والجواز والعيال.... وعلي فكرة مش هى دى الحياة اللى أتخلقنا عشانها فين "الرسالة "....فين القيمة اللى أحنا بنسيبها.... فين المباديء ..... فين العمل كلنا أيد واحدة من أجل شيء أكبر مني ومنك فين الوطن والدين من حسابتنا فى أجيال سبقتنا تركت قيم وأنجازات وتركت معانى فى غاية الروعه "جيل الخمسينات والستينات" .....وكان البشر يتمتعوا بكامل بشريتهم... كانوا بنى ادمين جيلنا بشكل عام أصبح يسعى وراء الماديات وبشكل عام أصبح عبدا لها... حتى الخطاب الدينى فى عصرنا أصبح يركز على الجانب المادى وترك الجانب الروحى والعقلى انا مش بطالب الناس أنها تهجر التعليم أو الزواج او.. او..... لكن مش هى دى كل الحياة لازم يكون عندنا" قضية" نعيش عشانها ونموت عشانها ومانجيش الدنيا و نرحل كالأنعام وما اعتقدش أن القضية هتكون الاهلى... او حتى السفر برة علشان تجيب فلوس... مش كل حاجة المادة...لازم شوية زهد والتحرر بعض الشيء من غريزة الامتلاك

والعمل من أجل أهداف أسمى واكبر من كده من أجل المعانى الحقيقيه فى الحياة واللى هى بجد فوق الجميع ************************